我求大俠前兩日睇到單台灣新聞，話有個男人喺捷運度偷拍隔籬女乘客嘅裙底，有網民發現呢件事仲拍低罪證，要網絡公審呢名色狼。點知，原來呢個男人竟然係嗰位女乘客嘅男朋友！不過，有偷拍女友呢種特殊癖好嘅男人，其實全世界都有，包括大名鼎鼎嘅阿仙奴射手阿歷斯山齊士。
掩耳摸頭扮冇事
喺二○一○年四月，山神識咗個智利女友叫華倫天娜，佢兩個好快撻着；到二○一一年十月，山神趁國際賽期有時間，由歐洲返家鄉會女友。小別勝新婚，華倫天娜都話，嗰晚開頭都幾甜蜜，「我哋有錫同攬，之後一齊沖涼。沖完涼，佢叫我喺度等一等，自己就出咗去先，我覺得有啲古怪。好快，佢返嚟抱起我去床度。我哋開始做愛。」
點知過咗一陣，華倫天娜就發現山神係個變態男友；喺山神嘅角度，就可能覺得自己識咗啲豬一樣嘅朋友，搞到東窗事發。華倫天娜話：「嗰陣我坐喺阿歷斯身上，聽到有啲怪聲，我問佢聽唔聽到。佢冇答，仲用手遮住我對耳仔，愛撫我嘅頭髮。過多幾秒，我再聽到櫃門嗰度有聲！我跳落床，打開櫃門，見到佢啲朋友，佢哋企喺櫃入面，塊面紅晒，仲拎住部電話。」
前女友奉勸女廠迷小心
無啦啦做咗小電影女主角，仲要係俾男友出賣，華倫天娜嬲到爆，立即搶走部電話扔爛佢，同埋拎張卡出嚟毀屍滅迹，之後着番衫走人，「阿歷斯話唔關佢事，係咁同我講對唔住。但我完全唔信佢，因為佢之前叫我喺浴室唔好出嚟住。」自此之後，華倫天娜就冇同山神聯絡過，一刀兩斷。
廿四歲嘅華倫天娜提醒各位女球迷，唔好咁易俾山神呃到，「對好多人嚟講，佢可能係一個榜樣；好多阿仙奴球迷都鍾意佢，因為佢識入波。可能阿歷斯覺得偷拍女人做愛係好有趣，但如果俾人偷拍嘅係佢阿媽或者姊妹，我估佢肯定會好煩惱！」我求大俠唔肯定華倫天娜嘅一面之詞係事實嘅全部，但知人口面不知心，奉勸各位球迷識男朋友、女朋友都要小心。
識睇，一定係睇足英台【英波Live】：
http://soccer.appledaily.com
http://bit.ly/engballlive