梁振英為咗同立法會一決高下，早前委任理大前副校長楊偉雄做創新及科技顧問同行政會議非官守議員，雖然冇局長之名，但絕對有局長之實。商台陳志雲上周就透露，原來好多嘢已經等緊楊偉雄大顯身手。
蘇局長坐埋一邊
志雲大師上周喺節目話，政府資訊科技總監賴錫璋退咗落嚟，邊個會接任，就係等候楊偉雄發落，等佢親自挑選。佢話楊偉雄同另一位行會成員羅范椒芬即將「行孖咇」，雙雙接受微軟邀請遠赴美國矽谷「出差」。志雲話呀，原本掌管創新及科技嘅範疇的商務及經濟發展局局長蘇錦樑，已經靜靜地被擺埋咗一邊，楊偉雄根本同與做局長無異。
其實梁振英無啦啦委任楊偉雄做創科顧問，激到唔少官場中人鬧佢無規無矩，唔少公務員傳緊曾經統領十多萬公務員嘅陳太早前評創科局嘅一席話：「（政府）以前從來唔會考慮，你（梁）係繞過立法會，可能唔同意佢哋手段，但係咁樣繞過既定程序。今時今日嘅特區政府係無規無矩，既定程序可以不理，由特首主宰一切。」
其實喺公佈楊偉雄職位當日，有公務員話同花生友一樣食花生，而佢似乎對梁振英「繞過既定程序」嘅做法見怪不怪，但行之已久嘅制度被搓圓㩒扁，唔會有意見咩？呢位公務員比志雲大師更超脫，用看破世事嘅腔調吐出一句：「只要你唔好對佢（梁振英）有期望，你就唔會失望。」
花生友