滙豐喺私銀逃稅醜聞陰影下，終於低調慶祝完一百五十周年成立慶典。集團行政總裁歐智華上周二傍晚喺中環滙豐總行，主持稻米雕塑開光儀式後，同傳媒零交流就即刻閃走，原來歐總同成班高層，跟住移師去對面太子大廈廿五樓嘅星級餐廳SEVVA舉行酒會，順便居高臨下，觀賞投射喺滙豐外牆嘅百五周年Lightshow。
據聞當晚酒會出席者，九成都係獅子行自己人，但未見經常來港同老友敍舊、被稱為滙豐神級大班嘅浦偉士；有說浦老好似有少少唔舒服，結果未有來港同滙豐慶生。
SEVVA係中環著名餐廳，老闆娘郭志怡乃香港名門望族郭沛勳家族嘅第四代，祖父係永安百貨創辦人之一，呢間餐廳嘅水準頗高，李嘉欣、「千億新抱」徐子淇都不時幫襯。獅子行喺呢度包場慶生認真識貨！