最近有不同嘅國際城市排名榜，如生活費、生活質素、居民快樂程度，之前又有宜居程度等等，每次香港都榜上有名，每次都名列新加坡之後。香港人最鍾意將香港同新加坡比，比完，輸咗，產生自卑感，硬係覺得己不如人，新加坡樣樣都好啲，即使自預算案提出「美食車」Foodtruck概念，食衞局講吓熟食小販牌照之後，一啲電台評論員就講埋新加坡有大牌檔，食物既便宜又衞生乾淨，言下有不勝羨慕之意。
左丁山就有唔同睇法，香港只要有一樣好過新加坡就得嘞，其他排名都費事比較。呢樣就係新聞自由、言論自由，香港千萬不可失掉、輸掉，話知你新加坡有幾衞生乾淨，偏偏連媒體都乾淨到得人驚，全由政府擁有或幕後發揮影響力，左丁山都係鍾意香港更多啲。一啲環保分子都讚過新加坡環境好，唔該環保團體諗深一層，點解新加坡填海咁耐，全無環保組織反對過、提出過異議？但香港講到填海，就反對聲音不絕？
一位讀者M來電郵詢問在檳城置業作投資及退休用途好唔好。讀者M最近到檳城旅遊，發覺當地風景靚，市民態度友善，當地樓價與香港比較，便宜得到，可以負擔得起，可以申請second home居民資格。既然讀者M問到，左丁山嘅淺薄見解如下：檳城係一個人情味甚濃、福建人聚居嘅華僑城市，識得福建話就最好，檳城近年經濟發展速度難與吉隆坡相比，在香港搵夠錢去檳城退休就幾唔錯，在當地投資搵銀或者打工，就制唔過咯，如果讀者M有餘錢，係可以買一間檳城second home嘅，擺喺度作渡假用途，退休後就過去長住，最好搵專業國際地產代理問清楚稅務及管理費用。居住在某一個城市，要講生活質素，一位讀者T來郵講佢在網上搵到一篇左丁山舊文講九龍塘會，講T君為咗家人／女兒嘅生活質素，好想加入九龍塘會，問有何方法。左丁山就冇資格引薦嘞，20幾年前鄧博士叫左丁山入會，左丁山因非九龍塘居民，猶豫未下決定，後來鄧博士仙遊，咁就冇入到會。左丁山代讀者T問過資深會員V，佢話入會要兩個遴選會員提名及和議，等候時間約六個月，接受面試，入會費四十萬元。請讀者T自己查吓九龍塘會有邊啲遴選會員係你嘅朋友，搵佢地幫吓手啦！