禮拜三(11日)谷草賽事用B欄，呢條魔鬼跑道走中外叠唔算蝕底，以最近1月14日同一移欄賽事為例，四場短途賽事雖清一色由前置馬勝出，但其中「無敵城堡」沿途三叠望空照贏。至於中距離就頗利居中後上馬，「綠野仙踪」、「皇仁威龍」、「連利之星」及「萬馬奔騰」都係沿途走二三叠，入直路飛出中外檔衝贏對手。所以應付魔鬼跑道，尤其中距離賽，不宜過份高估放頭或均速快馬。
今戰列陣馬中，第六場「連利之星」三次跑谷草均屬B欄，並取得兩冠一亞佳績，今次又等番B欄再上陣，擺明要在強項添食。另外，第八場「共創輝煌」上仗初跑谷草B欄即打開勝門，今次抽一檔好位，可跟前賺形勢，有力再下一城。