四十四歲嘅台灣玉女歌手蘇慧倫上年三月嫁畀商人孫益民後，七月去完歐洲度蜜月返嚟就有咗BB，預計五月頭生得，前日佢陀住八個月大巨肚同路嘉怡兩公婆喺台北嘆下午茶，陀B嘅佢完全走樣，身形脹爆，女神變成肥師奶，馮仁昭都幾乎認唔出係佢。佢老公同前妻所生女都有現身，繼女初時都幾俏皮，但作為後母嘅蘇慧倫眼矋一矋，囡囡即刻變乖，證明蘇慧倫管教有方。
嘔完恢復食慾
一班人傾到夜晚七點先走，蘇慧倫同路嘉怡走時留喺後面仍然雞啄唔斷，不過落樓梯時大肚婆就好小心，路嘉怡就喺旁邊扶住，從側面睇佢凸起嘅巨肚相當顯眼，蘇慧倫送路嘉怡上車後就獨自返歸。噚日佢又自己開車出街買嘢食，十分鐘就買齊魷魚羹同水煎包。佢經理人噚日話蘇慧倫陀B四個月時經常嘔，𠵱家先有番食慾，仲好聽醫生建議做多咗運動，有一晚佢十點幾想食生蠔，但因為太夜買唔到先至肯放棄。
撰文：馮仁昭