大部份脾氣馬去到老年，脾氣都會收斂，但當然有例外啦，李廐「享耆成」可以話係現役馬中罕有嘅老頑童，呢匹馬脾氣古怪，最鍾意同騎師搞對抗，成日出閘企定定，又或者陣上閃出閃入，去到家陣八歲，依然好鍾意玩嘢冇變過。
好似今季初出，「享耆成」就成尊佛咁，早段落後成條街大敗，係咪老咗冇戰鬥力唔想跑呀，又唔係喎！翌仗心情一靚，立即一放到底彈甩贏，嗰場亞軍馬「英勇大師」其後取兩冠一亞，跑一班賽都照贏，反映出「享耆成」呢匹神經刀肯專心比賽嘅話，根本係好勁嘅馬。可惜老頑童始終係老頑童，冇耐12月中有場嚴重外閃，玩到騎師透晒。
「享耆成」嚟緊禮拜三又再上陣，今次機會如何呀？計狀態就真係冇得頂，上周二試大閘，起步OK，直路推騎有反應，加速強勁下勝出，脾氣似乎冇發作迹象，今次排4檔有馬喺外側擋住，外閃機會亦唔高，佢畢竟係八捷良駒，除非跑嗰陣又突然玩嘢，否則年輕女馬主鄭泳妮同佢爸爸鄭錦鐘，應該有機會拉頭馬！