台維斯盃上個周末進行咗世界組首圈賽事，由梅禮孭飛嘅英國竟然淘汰咗美國，算係爆出一個冷門。唔知係咪太意外，興奮到爆嘅梅禮喺賽後口多多，「踢爆」隊友一腳踏兩船。
台盃挫美國晉級
由於梅禮周日打完台盃就要急急飛去美國參加印第安韋爾斯賽，唔可以同隊友齊齊慶功，佢就搵隊友艾格洛講笑：「我知佢喺格拉斯哥呢度有個女友，隨時預備好可以慶祝。」成班球手笑到肚痛咁滯，惟獨艾格洛就鬼咁尷尬；事關佢嘅女友根本冇去蘇格蘭，但就留咗喺倫敦屋企睇直播。艾格洛之後急急上twitter，解釋梅禮只係講笑，自己絕對冇背住女友收埋第二個女仔；但連英國網球聯會後尾都走出嚟幫佢澄清，反而有啲此地無銀喎。
梅禮隊英國成功喺主場贏波出線，另一邊廂由網球王子錦織圭壓陣、作客加拿大嘅日本隊就冇咁好彩嘞。錦織圭雖然有驚無險都贏晒兩場單打，但係幾位隊友實力始終爭好遠，場雙打同另外兩場單打都輸晒，結果就以總場數2:3飲恨。而衞冕嘅瑞士冇咗費達拿同華域加即刻唔掂，輸咗畀比利時，一樣只可以打護級戰。