上市公司東方明珠前主席黃坤、前副主席劉夢熊涉串謀詐騙同洗黑錢單案，噚日喺高等法院提堂。法官彭寶琴應大狀要求，比正常時間早十五鐘放午飯，點知出事。
成班記者緊隨尖啤入𨋢離開法院、架𨋢由十樓去到二樓時突然「轟隆」停咗。尖啤、代表佢嘅資深大狀謝華淵以及代表第三被告翼小紅嘅資深大狀黃敏杰、仲有外籍主控官區達平等十七人，齊齊困𨋢。其中一位攝記㩒警鐘求救，保安員話會叫師傅嚟，但過咗十分鐘，仍然無動靜，唔少人開始唔耐煩；後來發現保安竟然冇叫消防就更加躁。全𨋢只有黃大狀嘅電話仲接收到，惟有靠佢報警，尖啤都發火話：「又話（師傅）兩分鐘嚟！」最後差唔多廿分鐘先有技工嚟解困。
司法機構回覆查詢指事後向被困人士致歉，但被困嘅記者完全冇聽到有人道歉。另外黃坤噚日缺席聆訊，獲准延長保釋。