中央減息後，投資者喺25000點附近獲利沽貨，大市好消息都升唔起，自然要跌，呢個係簡單不過嘅道理，不過，上星期二至五跌足四日，又真係比預期跌多咗少少。
上星期五晚美股道指跌接近300點之際，內地A股噚日又反彈頂住，港股低開完做番支陽燭，短期似有回穩迹象。
另一項安全指數，就係近期跌市，細價股炒作氣氛反而番晒嚟，顯示大戶對於市況感覺唔太差，先至安心炒作。
睇圖的話，24000點係恒指舊年十一月初到十二月初五次受阻嘅水平，突破後調整番去呢個位，相信會有唔少支持。不過，讀者們仍要做定兩項安全措施，第一，假設恒指之後掉頭隊番落去，唔單止係震倉式輕微跌穿23900點，而係急跌去到23700點，就唔排除市場負面情緒放大，到時最好減倉；第二，切忌低吸莫名其妙轉弱嘅股份，以免放大損失。
總括嚟講，論值博率，近期應該係加注嘅時候，而依晉佳近期選擇，強勢優質二、三線股會係呢個時候嘅較佳出路。
三月份去到業績期高峯，比亞迪電子（285）應該能夠出一份靚仔業績。呢間公司嚿年上半年收入按年升19.8%，去到91.04億元人民幣，與此同時，研發費用、銷售費用以至行政開支都只保持平穩，令到純利按年大升86.3%，至5.9億人民幣，每股盈利0.26元人民幣。
有力挑戰十蚊
比亞迪電子係全球能夠量產金屬手機外殼嘅公司當中，唯一未接蘋果大量定單，未接蘋果大量定單對於比亞迪電子反而係一個好處，就係未來可以接多啲蘋果死對頭三星嘅定單。
比亞迪電子逐漸擺脫低端手機OEM供應商嘅形象，逐漸靠攏蘋果同三星兩大巨頭，所以喺手機設備股當中，佢嘅強勢漸漸緊隨蘋果概念股瑞聲（2018）同埋舜宇（2382），開始拋離低端手機股酷派（2369）、富智康（2038）之流。
大行花旗估計，比亞迪電子嘅金屬外殼盈利比重，將由2014年嘅42%，增至54%，二○一五年每股盈利預測0.74元人民幣，預測二○一五年市盈率只係9.6倍，估值遠低過瑞聲同舜宇。
比亞迪電子近期股價硬淨，跌市之中，慢慢挑戰九蚊阻力。喺全年業績相當靚仔之下，相信炒業績足以令股價挑戰十蚊，中線博佢升到預測二○一五年市盈率十二倍，目標價可見十一蚊。
晉佳
http://www.facebook.com/pages/晉佳/719009541518415
本欄逢周二刊出