每逢兩會，軍工股新聞零舍多，因為唔少軍方高層係人大代表，一年之中惟有呢個時候先可以出來講嘢，為市場帶來炒作。內地股民炒軍工股，其實都有分板塊輪流炒，例如前年炒北斗導航概念的衞星股，去年炒無人戰鬥機概念的飛機股；而到今年，似乎輪到已沉寂幾年的航母股有翻生。滬港通名單上的中國船舶，昨日升逾6%，其他例如廣船國際、撫順特鋼亦都升逾2%。
二○一二年遼寧艦落水時，航母股曾經大紅大紫，當時情況誇張到，每逢遼寧艦出海訓練，相關股份都要升一輪贈興，嗰種混合民族情緒的市場亢奮心理，香港股民恐怕好難理解。呢期又炒啲乜？原來喺上周日，海軍丁海春中將接受訪問時表示，中國正在建設比遼寧號更先進的第二艘國產航母，是軍方第一次公開證實航母在建的消息。咁都未算犀利，已經退役的劉曉江上將話，需要在「兩個戰鬥方向」（可能分別指日本、越南）保持航母艦隊，執勤、維修、訓練各一艘，即係話，至少需要六艘。
連央視也走來湊熱鬧，上個禮拜節目話，中國可能已研發出航母彈射器，喺繼美國之後，全球第二個擁有呢種高端技術的國家。種種迹象顯示，似乎阿爺又再將大煲航母概念。
李可強