上周英國波戲碼淡靜，喺爛場、細場下睇足咁多場直播，冇場好波，納悶得似近排香港潮濕天氣，嗰一刻，真係有啲討厭英國波。
對待足總盃，各有唔同心態。利迷想謝拉特帶隊入決賽，離隊前「最後一次」亮相溫布萊；維拉悶足大半季，但換咗新領隊，四天內雙殺中部宿敵西布朗，率先入足總盃四強，球迷興奮到衝晒入場慶祝。早早出局嘅英超隊，難得有空檔，不愁寂寞；韋斯咸同修咸頓踏入今年，戰績跌watt，分別去杜拜集訓同瑞士滑雪散心，球員平均每月出份百多萬港元嘅波糧，包埋星級年假。早出局，咪話唔爽。
人哋去滑雪嘆世界，能力同實力高半班嘅利記，足總盃抽到好籤，當然希望勤力出賽有回報，主場掃走英冠爭升班機會唔大嘅布力般，未幫到大隊長謝四，先幫領隊羅渣士首次領紅軍打入溫布萊，亮相四強。可惜唔係打所謂三四一二或者三四三陣式，一定強於入波；利記同曼聯經常打三後衞陣式，但目前喺聯賽嘅入球，與三甲球隊有一段距離，防守亦唔見得特別出色，紅軍今場表現唔算差，只係布力般實在守得出色。
布力般喺英冠打慣四四二搶攻，今季足總盃三鬥英超隊未敗，都係識得敵進我退；只屬二號箭頭、法籍嘅貝寧射手基斯泰迪，喺禮拜日布軍嘅四五一陣式中，藉對手主力中堅史卡迪爾一早傷出，牽制力更強，搶眼過紅軍嘅史杜列治同史達寧（左），更唔使講後備入替如同隱形嘅巴神。
利記由月初起，已八天內連踢三場主場，晏菲路球場草地狀況唔理想，間接影響球隊地面進攻嘅流暢度，亦正正反映今季比賽嘅頻密。佢哋今季暫以出賽四十六場，僅少熱刺一場，成為英超出勤次數第二多球隊，出戰歐洲賽去過西班牙、保加利亞、瑞士同土耳其；國內作客過蚊型場嘅AFC溫布頓同南下般尼茅夫，紅軍並將要下月初北上布力般爛場，冇得點唞。
對比其他前列隊，紅軍今季已較阿仙奴同車路士多踢四場，比上周末去咗滑雪度假嘅修咸頓，多踢十一場；而佢哋上季奪得聯賽亞軍，但同期至三月初，只踢了三十三場波，今季戰事大幅加密，搶歐聯位，大不「利」。
足總盃半準決賽頭三場僅共入兩粒，悶戰連場；希望今、明兩晚歐聯好波重演，答謝捱夜球迷。最有信心係車仔，早喺一月尾足總盃竟然輸畀甲組巴拉福特，但間接換來踢呢輪歐聯兩回合前，有充足休息之利；摩佬算死草，少捉蟲，明晚唔會怕巴黎聖日耳門來犯，半/一盤，可捧。
文：波神