林文龍同郭可盈2004年結婚，雖然曾經有傳出過婚變，但兩位當事人矢口否認，仲指相信係有人搞事。
其實佢哋兩公婆一直都好恩愛，不時喺微博大晒家庭溫馨相，好似上年可盈生日，文龍準備咗生日蛋糕，屋企仲佈置得好靚，一家三口齊齊慶祝，當時可盈喺微博留言話：「一年容易又生日，今年的生日歌由津津親自鋼琴伴奏，愛心演繹，份外悅耳動聽！」
今日就係文龍同可盈嘅結婚11周年，文龍昨午喺微博上載幾張相，原來文龍上次更新微博，已經係去年9月了，文龍留言表示：「明天就是我倆結婚11週年，她終於肯跟我一起做運動了，就是『行山』，下午再帶個女去沙灘玩，天氣很好！生活其實真的很簡單！」原來文龍同可盈去咗行山慶祝，之後同囡囡津津去咗沙灘玩，兩父女玩得好開心，津津仲錫錫爸爸，文龍當然甜在心啦！