中聯辦主任張曉明近日，指內地為確保「一江清水向港流」而做咗好多工夫，反映內地同香港血濃於水，更加話東江水唔係一個可以「用錢算賬」的問題。
首先，中國做再多工夫都係有反映喺水費上。根據香港與粵海投資（270）所簽協議，未來三年東江水平均每年加價6%，三年水價共一百三十五億元，價格仲要比其他內地城市已高出數倍。第二，由於供過於求，每年有好多水倒入鹹水海，政府仍堅持買咁多。粵投水資源業務根本冇得輸，如果血濃於水，內地就唔會搵香港笨吧？賺咗我錢就話講心唔講金？要回應的話，可用阿Sa新片《雛妓》嘅一句對白，「我有畀你X㗎！」
轉一轉話題，呢期阿里影業（1060）發力勁升，走勢靚爆。怕高處不勝寒，可轉吼漢傳媒（491）。阿里影業同漢傳媒有個共通點就係同為「明星效應股」。如果你認為趙薇用大拿拿三十一億入股，冇理由唔炒時，漢傳媒都係同樣道理。近呢半年，楊受成旗下公司好多動作，好似賣咗畀恒大（3333）老闆嘅新傳媒（708），英皇證券（717）去年底亦喪炒，謝霆鋒同楊生關係密切，楊生點都會過兩招畀霆鋒嘅。漢傳媒之前炒到0.6元，股價調整震倉後，噚日大陽燭炒高，成交配合。如果破到0.62元，不妨跟進。你諗下，阿里影業炒到十倍PB，漢傳媒而家只係1.7倍咋。
Fifi
http://www.facebook.com/lovefrystock
本欄逢周二、四刊出