上月尾金管局再出辣招，收緊按揭承數以遏抑細價樓炒風，唔少業界人士當時已經覺得呢招冇乜用。出招後第一個禮拜，新鴻基地產（016）同新世界發展（017）甚至有董事增持，擺明唔怕辣喇！
根據聯交所資料，新地非執董李兆基（四叔），喺辣招推出後首個交易日（2日），即刻用每股121.03元買三十萬股新地，翌日（3日）再用每股122.42元買多十一萬股，兩日總共斥資四千九百七十七萬元。
新世界非執董鄭家成（主席鄭家純細佬）以往好少出手增持，佢上周三（4日）亦忽然以每股9.13元增持五十萬股新世界，總計用咗四百五十六萬元。
其實金管局加辣後呢個多星期，地產商基本上都如常賣樓，家陣四叔與鄭家成真金白銀拎錢買地產股，有乜意思？你懂的。