青年事務委員會現任主席陳振彬做到三月底就卸任，到底邊個接任做揸fit人？八方嘅鄰居花生友早前就寫過，梁振英有意搵華人置業主席劉鳴煒MW接任，但之前突然爆出卡羅琳醫學院捐款風波，唔知會否令政府覺得時機不宜、唔想喺呢個時候委任MW以免招人口實。
但有政界中人同八方講，相信政府至今情傾MW做主席，佢好心水清留意到MW舉動頻頻，先係喺日前嘅青年高𥧌會由朝坐到晚，唔單止朝早做講者，就連下半場嘅研討會都坐到足；而青委會之前有啲講座，亦特別搵MW做講者，有意等佢早啲同呢個諮詢組織「發展關係」。據聞MW受唐唐重用後、竟又成為CY愛將，係因為一位有勢力人士推薦。大家留唔留意到，究竟邊位「大佬」撐完唐唐，CY依然要畀面呢？