「生命是一襲華美的袍，爬滿了蚤子」。費清上星期五喺金鐘亞洲協會香港中心，睇嘅《無常人生：奈良美智》展覽，就充滿呢種衝突、無奈：純真小孩配邪惡樣，輕快嘅美式民謠配哭泣嘅女孩雕像。
畢加索講過，藝術唔係用嚟裝飾你間屋嘅。但希望佢唔好怪費清，因為奈良美智今次為展覽設計嘅青花瓷碟（圖），真係好靚呀。不過，費清去到個展覽問，接待處個女仔話未有得賣住，要廿四號先有呀。吓？
按展覽官方facebook，奈良美智展覽陶瓷會喺三月廿四日至七月廿六日發售，每星期售一百套，每套九百八十八蚊，但同時要喺展館正確回答一條 有關展覽嘅問題，而且每人只可買一套（嘩，過五關斬六將咁款）。
原來，奈良美智之前已經喺個人fb留言，話隻碟其實係遲咗推售，之前因為產品質素有啲問題，而之後製造碟嘅廠商要押後到農曆新年之後先開工生產。聽講呢間製造商同奈良美智合作多年，應該工多藝熟，但奈良美智出名要求好高㗎。咁都好，費清都想買番嚟嘅碟係盡善盡美。
除咗青花碟，展覽仲會賣Shinning Dogs奈良小狗㗎，奈良美智之前話應該喺開幕日、即係三月六日可以開售，但展覽官方facebook就話要延期，開售日子待定。主辦嘅亞洲協會負責人唔肯回應精品製作問題，只稱「Artist想精益求精，品質係佢控制嘅，（瓷碟）廿四號應該可以發售㗎喇，我哋網都係話廿四號出」。
費清
＃要生計，也要生活 ＃毋忘初衷