本月1號雷神莫雷拉贏六場，到剛周日冇咁叻，但都有五win，真係勁到爆燈，家陣彈甩潘頓30場，潘頓想蟬聯冠軍，睇怕佢自己都唔相信做得到。
咁本周三(11號)谷戰騎師王形勢又點呀？只得一個騎師跑足九場，大家都估到，咪就係雷神囉！其他好手好似投晒降，潘頓有四場坐冷板點攞分呀？而韋達已四期食白果，個勢輸晒。
睇番雷神座騎，「共創輝煌」、「飛龍駒」、「連利之星」上場非冠即位近況好，尤其「共創輝煌」今次排一檔，形勢大大有利，四歲馬在港只六戰，仲有好多進步空間，剛周日假期雷神唔瞓多陣，特登到場親操，可見心中有馬。
至於「陽明揚揚」上仗漏閘名次好後，但復課試過兩次大閘，谷閘轉彎暢順後上有力跑第三，而泥地大閘則起步敏捷有前有後取勝，質新實力馬脾氣有轉好跡象。其餘「糖黐豆」等上場走勢亦見改善，雷神接手發揮一定更好，睇怕騎師王彩池佢又冇得輸咯！