聽講噚日係香港報業史上嘅一個里程碑。壹傳媒平面媒體總裁兼《蘋果日報》社長葉一堅日前喺本版專欄透露咗：「香港《蘋果》將會在本周出現史上第一位女總編輯，一位批判性比我高九倍的年輕美女。」仲叫各界“Watch Out”，搞到政界噚日議論紛紛，呢位「美女」到底係乜水？
盼做好屬於港人嘅報紙
八方揭謎底，查實佢係喺新聞界工作超過二十年、現年四十五歲嘅資深傳媒人陳沛敏。「美女」老總噚日已經就職，新聞界前輩話，陳總係現有主流媒體中最年輕嘅老總。有讀者留言畀堅哥話：「唔靚唯你是問。」陳總就解釋，「年輕美女」呢啲形容詞，係傳媒常用來吸睛嘅慣技，所有探員都係「神探」、醫生都係「名醫」、女警必屬「警花」。
跑過九一一恐襲、日本大海嘯、劉曉波獲頒諾貝爾和平獎等國際大新聞嘅陳沛敏，並唔係人人都識，起碼堅哥有位朋友就打電話畀佢話：「你唔係真係升咗黃之鋒阿媽做老總吓嘩？」事緣雨傘運動期間，有人亂傳黃之鋒阿媽係《蘋果》副老總，居然有人開玩笑！
八方噚日恭賀陳總升職之餘，問佢有乜履新感言。佢話堅哥日前同佢講：「嚟緊你要辛苦啲喇！」佢就回覆，多謝堅哥提拔，然後講笑話，但願唔好好似亞視咁喎，即係升職唔加人工囉。
講番正經，《蘋果》即將踏入二十周年，喺紙媒正面對前所未有嘅嚴峻挑戰、香港新聞自由霧霾重重嘅光景下，「美女」老總話希望同同事一齊繼續做好《蘋果》、繼續做一份香港人嘅報紙。
李八方
mailto:[email protected]