以為抽到對英冠隊就好易踢？未必，好似利物浦咁，佢哋喺周日場英足盃八強主場對布力般流浪，受制於對方勇悍嘅防守，又差啲運氣，結果互交白卷，兩隊要擇日重賽。紅軍中堅史卡迪爾喺比賽中頭部受傷暈低，好在佢喺賽後報平安，相信唞幾日就冇事。
史卡迪爾撞到昏迷
開波兩分鐘，史卡迪爾同對方爭頂，頭部先落地，即時暈咗，好在經隊醫治理約八分鐘，再用擔架抬離場送院檢查。被抬走時，史卡迪爾已經回復清醒，仲高舉兩隻手指公；賽後佢亦喺網上報平安：「我冇事，係曾經失去意識，但唔太嚴重。我想繼續踢，但隊醫唔畀，要跟規矩做嘢。」講番場波，後備入替史卡迪爾嘅高路托尼表現唔錯，試過入波但越位在先被判詐糊，之後又有次頭槌中柱無功而還，結果雙方踢成0:0要重賽。至於巴洛迪利今場後備入場冇波入，又俾人鬧，呢次係紅軍名宿羅倫遜，佢話巴神一百次入面有九十九次都令人失望喎。
賽後最多人討論嘅係布力般嘅踢法，唔少紅軍球迷都話呢隊係「暴力般」，踢法好勇悍；而球證馬連拿亦好鬆手，成場波淨係派咗兩張黃牌，其中一張仲係畀利記。有網民批評馬連拿偏幫布力般，漏判咗十二碼，例如基加隆上、下半場分別推低拉爾拉拿同捉住史杜列治隻手，馬連拿都冇判到十二碼。利物浦領隊羅渣士賽後雖然大讚布力般守得好，但認為球隊應該有個十二碼喎。
識睇，一定係睇足英台【英波Live】：
http://soccer.appledaily.com
http://bit.ly/engballlive