越來越多人鍾意用平板電腦、手機搭車時睇電影、煲劇，可惜喺飛機用WiFi仍然未普及，大家搭飛機就逼住睇住椅背個mon，mon細唔在講，如果前面條友一時靠前一時靠後，真係俾佢玩死。
不過，其實喺飛機入面，航空公司已經有一套無線系統，港龍就用呢啲技術，喺部份客機提供機上娛樂串流服務。港龍喺空中巴士A320機隊，配備咗無線機上娛樂串流系統（Wireless IFE），乘客只需使用自己部平板電腦或智能手機，就可以同飛機嘅娛樂串流系統連接，睇晒所有提供嘅電影、收聽音樂同收音頻道，仲可以睇埋地圖㖭。
平板電腦、手機等只要有StudioKA應用程式，就可以經Wireless IFE接收機上提供嘅娛樂。乘客要喺登機前，下載StudioKA應用程式，如果用Android平板電腦同智能手機，就可以喺航程中隨時下載StudioKA應用程式。當然，如果你搭商務艙就更方便，因為商務艙乘客係可以借用已經有應用程式嘅平板電腦㗎，仲有機上使用嘅消音耳筒。
費清 ＃要生計，也要生活 ＃毋忘初衷