立法會內有唔少議員身兼港區全國人大代表同政協委員，為咗遷就佢哋兩會期間北上開會，立法會都休會兩星期。既然唔使主持會議，立法會主席曾鈺成亦抽時間外訪，今日起啟程去東京，星期五返，陪佢出訪嘅仲有立法會秘書長陳維安。
立法會秘書處話此行係應日本外務省嘅邀請，曾鈺成期間會到訪日本國會、參觀多間企業同機構，亦會禮節性拜會駐日本大使館公使兼臨時代辦韓志強，唔少得嘅環節，當然係同居於東京嘅港人會面，唔知居日港人支唔支持曾鈺成選特首？而曾鈺成噚日出席一公開場合時就話，即使無法律規定白票守尾門，但選舉中如果有太多白票，都會令當選人欠缺認受性，非中央樂見。