港澳埠際賽頭關港澳盃今年一反常態，編喺禮拜日舉行而非周六，呢日第九場港澳盃三級賽1400米，未跑已由主隊控制晒電算機，摩廐高價自購馬「魔法豪情」在港未贏過都越賣越熱，1.7倍開跑排一檔起步，雷神騎到全程一步不蝕，就係憑呢項優勢頂足成條直路，影相氣走熱門「比卡超」同大冷門「夢仙」，以短馬頭位之先，捧走第12屆港澳盃，馬主蕭百君今季首度贏級際賽。
雷神去年在氹仔馬場以方廐「城中話題」勝出澳港盃，事隔不足一年贏埋港澳盃，而大摩亦繼2007年「勁闖」及2012年「超皇鷹」後，第三度奪港澳盃，成為此賽捧盃次數最多練馬師。
今場拉士鬥埋一舊，「比卡超」跑第二係影相之下拎到，「夢仙」姍姍來遲僅得第三，第四名更加連電眼都分唔到，「好健康」同「萬事勇」平頭第四；「好健康」衛冕港澳盃失敗。客軍今屆出五駒，當中除咗「新品威」，其餘全部超過300倍，結果澳門馬連續第五年前四名不入，「大阿哥」後上跑第八叫最叻，其餘「新品威」第十，「來來來」、「福嘉旺」同「易通錢」包辦最後三名。
雷神此日先後勝出「彩球」、「曦世之寶」、「鈦金剛」、「嫡愛」及「魔法豪情」，他的妻子向來極少在賽日出現，今季只在國際賽日賀雷神奪香港一哩錦標及香港盃，但這天突然扮靚靚，著住黑絲現身港澳盃頒獎台，可見雷神夫婦對此賽十分重視。