上周六場英足盃夠晒火爆！阿士東維拉主場贏西布朗2:0入四強，雖然兩隊各有一人被逐，但呢場最爆嘅係維拉球迷。佢哋喺完場後衝入球場，興奮到連自己友都唔放過，好似想將入球功臣戴爾夫分屍咁，仲激過噚日喺屯門啲反水貨客示威！
維拉靠戴爾夫同史葛冼佳亞各入一球，贏2:0晉級，但有基亞利殊拎紅牌，至於西布朗亦有耶高比領紅被逐，雙方尾段十打十。補時三分鐘，大局已定，維拉球迷開始衝入球場。開頭只係有十幾個人跑入去，啲保安即刻追出去，用咗兩分鐘將啲搞事嘅球迷趕走。球證安東尼泰萊見到場面似乎穩定番，就決定繼續比賽。
入波功臣慘被咬
不過，我求大俠就完全唔覺場面受控囉！數以百計嘅維拉球迷離開座位，開始聚集喺邊線，有啲人擺定姿勢，好似等馬拉松開跑咁。補時臨尾幾分鐘，簡直係暴風雨前夕一樣，都唔明點解安東尼泰萊唔及早吹完場波，等啲球員快啲返入更衣室。當哨子聲一響，場面極之混亂，數以千計嘅球迷好似潮水咁湧入場慶祝，西布朗班球員嗱嗱聲跑去球員通道，但都有唔少人中招，好似門將邁希爾、奇治戴臣同卡林麥馬拿文等都據稱被襲擊。
維拉球員亦唔能夠倖免，中場戴爾夫簡直好似成為老虎群中嘅小綿羊，佢賽後回憶：「實在太過恐怖！有人咬我，當時好危險，我嘅臂章被撕爛，有人搶走咗我左腳隻鞋。」
我求大俠睇番段片，保安同警察數目唔多，大部份仲唔敢踩入草地，好多只係喺場邊排排企，睇住啲人衝落場，好似紙牌人咁，完全阻止唔到件事，更加冇去保護球員。
普利斯斥保安不力
西布朗領隊普利斯斥責維拉請唔夠保安，「維拉要好好檢討保安工作，呢場係全場爆滿嘅八強，戲碼又吸引，應該喺兩邊底線都增加保安人手。呢啲事喺七、八十年代先會發生，我唔想再見到。」雖然維拉方面都發聲明譴責球迷，但相信英足總肯定秋後算賬，罰款點都走唔甩，甚至會喺嚟緊嘅比賽封閉部份看台。
識睇，一定係睇足英台【英波Live】：
http://soccer.appledaily.com
http://bit.ly/engballlive