電訊公司請吃飯，因業績唔錯，眾人問幾句就轉問其他話題，CEO W先生話去年業績全靠iPhone 6帶動，銷售業務在2014年九月後來一個大反彈，扭轉悶局，表面上係全城搶購iPhone 6，令銷售大增，但大芒iPhone帶來更長遠影響，就係用戶睇YouTube、fb，上網、照片、文字更加容易，導致數據（data）使用率大增，收益超過晒語音電話，W先生話：「靠你地打電話，唔賺得幾多，不過好多謝你地大大增加fb、YT嘅使用量，再加埋上網，我就笑騎騎，因為你地習慣咗就放唔低，每月增加我嘅ARPU。」立即做個調查，原來在座各人差不多人人每月交費都要top up（即超過預定計劃嘅使用量，要俾多啲費用），原因就係手多多，貪好睇，用多啲數據囉。
左丁山向W先生潑下冷水：「今日（三月三日）華爾街日報話多用WiFi，少用網絡商，可以慳錢噃，今天之40歲以下人士愈來愈多用WiFi，少用Plan，會影響你地公司嘅收入。」
W先生話：「騎騎，我地一早諗到，所以過往幾年不斷開發WiFi熱點，減輕網絡頻譜負擔之餘，亦可彌補收益，我地嘅營業方針係估計用戶在室內用WiFi，室外用數據，你話啱唔啱？」啱嘅，不少80後如肥仔K等正是如此，W先生又話佢地從數據得知，用戶大量拍照（因唔駛俾菲林錢），達濫拍程度，拍完又用email或WhatsApp傳來傳去，於是公司發展數據中心，提供雲端儲藏服務，分析L話佢就係呢種人士，儲埋四萬張相片，眾人聽咗，為之嘩然，分析L話屋企有三個伺服器，保證唔會因意外而遺失所有照片。基金P嘆曰：「以後發展商起樓，要起多一間房嚟擺伺服器。」唔駛咁誇張，擺上雲端咪得囉！
食完飯行出酒家，在大道中漫步，突然碰到大記者落巴士，佢話坐巴士夠舒服，包有位（因乘客少），唔趕時間就最啱，佢在銅鑼灣上巴士時，有一位人士拖喼上車，巴士一下急停，該位人士幾乎仆落地下，好彩大記者就在後面，伸手攙扶，先至冇跌親，人士講廣東話，對大記者講：「你地香港人有禮貌，又肯幫人，多謝晒。」咦，何出此言，來自何方呀？乘客告知大記者：「我係廣州人，好鍾意香港環境，一個月來港兩次購物，購物前先到維多利亞公園散步行一個圈，呢個公園實在好好，夠乾淨有秩序，習主席現在講依法治國，講法律不過仲係一味講箒，未做得到，唔似得你地會做，唔駛講，剩係貨物都依足法律，貨真價實夠便宜喇，我在廣州成日驚買到假貨呀，上網又係買到假貨，嚟香港最好。」