人大委員長張德江點名批城邦論之後，作為國師嘅陳雲繼續死撐，一時又話自己冇話過要香港自決，好似想話港獨唔關佢事、一時又大講中共倒台，就係佢城邦建國之時，但有政圈好事之徒話，國師親密戰友毓民近日嘅舉動更有趣，相當值得留意。
主張「不必喊打喊殺」
話說張德江未出招、范太未話光復行動係港獨之前，毓民二月中已經寫咗一篇文，提到熱血公民參與反走私水貨抗爭。全世界都知毓民同「皇上」黃洋達主張勇武抗爭、恥笑泛民和理非非、佔中三子等差人拉、唔反抗係「鳩做」，但教主喺篇文話熱血公民早已採用「文化抗共」為其主要理念，「溫柔敦厚，不必喊打喊殺，為行動提供理論基礎」。
好事之徒話，如果熱血公民唔要勇武抗爭、仲要「文化抗共」，咁同泛民和理非非、佔中三子等拉「鳩做」有乜分別？但最有趣係教主二月中就「宣佈」熱血公民喺反水貨行動「文化抗共」，不必喊打喊殺，咁啱張德江啱啱開腔炮打反水貨，究竟教主政治分析了得，得以提早退兵，定係收風比人快，春江水暖鴨先知？呢一點，八方真係唔知。