上星期，本欄建議大家清倉，果然，恒指跌659點，除非你買咗漢能薄膜（566），並且係九蚊樓上沽貨，否則上個禮拜都係沽貨、唔做嘢，好過買貨。禮拜頭手痕，因為政府辣招推介環球信貸（1669），可惜有跌幅冇升幅，短炒博一鋪只可以止蝕離場。
咁今個禮拜又點？當然係繼續冇運行，第一個原因同之前講嘅一樣，阿爺有好嘢，會益你？
開緊兩會九萬幾人收晒風，到放風時候已經係出貨時間，何況今年中央目標係「保七」，符預期地經濟向下，都仲係差，而且，最近減息咁大件事嘅政策對股市都冇刺激作用，中央要加好大「力度」推政策先有機會令市場驚喜，以今屆政府作風，唔似。
第二原因冇咁多理論。做得政協同人大，都係全中國最內幕嘅內幕者，收風嗰班去晒北京開會同花天酒地，仲有邊個去炒股？
上個禮拜兩會一開個市就跌，正好摑咗嗰班成日話阿爺唔會畀個市跌，唔想股民遷怒共產黨嗰派人一巴，股市根本唔會有個阿爺去在乎你點諗，只會有一班內幕者想你接貨，呢個就係人食人嘅國情，玩得就預咗，驚輸唔該好恐懼咁去行山。
呢個禮拜都未必值得買貨，但唔代表乜都唔做，如果舊年牛市變成慢牛有排等，又係時間搵一啲細價股、殼股出嚟監視住。
先思行有力見一蚊
例如上個禮拜五，先思行（595）爆升12%報0.47元，爆升後，市值只係3.6億元，根據一啲人嘅講法，殼價都值四億元，應該好抵，且慢，而家並唔係殼股潮，且二○一三年傳過小米入股後否認，之後冇晒下文，之後邊個推介邊個死，股價一路跌，跌到今日冇乜人會提。
公司二○一四年度純利三百四十萬元，二○一五年上半年由賺轉蝕，蝕兩千四百五十萬元，做咁大生意都係微利或者虧蝕，咁啱呢兩年殼股潮，之前又傳過小米入股，有呢啲風聲或動作，唔排除之後會繼續有賣盤或賣股嘅消息，幫助股價炒上，再次因為一個消息炒上一蚊。
二月先思行試過爆一棍無功而回，回落0.42元樓下，上星期五又神奇反彈，但而家個勢唔就，又冇乜特別新聞，睇怕命運都係一樣，爆上後慢慢回落，暫時都係得個睇字，睇下有冇機會回落番去0.4元樓下，然後再作打算。
高明
http://www.facebook.com/BigRiceTea
本欄逢周一刊出