美國夏令時間開始會叫「Spring Forward」，要撥快一個鐘，亦解「向前跳躍」嘅意思。當夏令結束就叫「Fall Back」，時間向後撥慢一粒鐘。蘋果舉行「Spring Forward」，大家上個禮拜五估緊活動會發佈Apple Watch。
有人會問：「買咗iPhone啦，點解仲要買隻智能手錶？」呢條問題同當年蘋果推iPad如出一轍，「買咗iPhone啦，點解仲要買iPad？」結果蘋果公司開創咗平板電腦市場，用家咪又係iPhone同iPad兩樣齊齊用，更令桌面電腦銷售一落千丈。呢幾年平板電腦越出越多，但iPad銷量都過關，二○一○年至今累積賣出2.4億部。蘋果產品成功地方，就係擁有擴大產品生態系統嘅能力。今次Apple Watch具備上網功能，但用家首先係要有i-系列產品。Apple Watch需要用藍芽同iPhone 5或iPhone 6連接，配埋最新作業系統iOS 8，隻錶就可以上網。
蘋果今次較其他智能手錶遲一步推出Apple Watch，但相信佢有能力同對手撼過。市場估計iPhone 5同iPhone 6用戶合計有四億，可見Apple Watch潛在用戶市場龐大。大行亦睇好Apple Watch銷情，摩通預測今年銷量有二千六百萬隻；出年銷量更增至五千五百萬隻，並帶動整體銷售升一成。蘋果股價由去年十月起累升超過五成，距離歷史高位只係一步之遙。話唔定新錶有機會帶動蘋果股價勁升，公司市值破萬億美元。
C+B
本欄逢周一刊出