楊千嬅、古天樂新戲《五個小孩的校長》，搵咗五個從來冇拍過戲嘅小朋友合演，而做呢幾位小朋友嘅家長角色，就有吳耀漢、吳浣儀、姜皓文同劉玉翠。呢幾位老戲骨都係好戲之人，好似一把年紀嘅吳耀漢，為咗囡囡嘅飛機師夢，着晒機師服，十足《衝上雲霄》嘅吳鎮宇一樣，佢笑話：「好耐冇試過咁型仔，亦都好耐冇拍過咁有heart嘅電影，拍嗰時天氣好熱，其實着住機師服一身汗，但都好過癮㗎！」而吳浣儀就好耐冇着旗袍，一着就要扮香港小姐，佢笑話：「攞冠軍喎，梗係未諗過啦，仲要喺酒樓後巷加冕，呢場戲真係難忘。」
姜皓文感動到喊
姜皓文反而讚小朋友太好戲，搞到演跛子嘅佢真係喊咗出嚟：「做我女嘅嘉嘉實在太強，有幕講我實現夢想做跑手嘅戲，嘉嘉嗰種真情流露一心想我跑贏比賽，喺旁邊為我着緊嘅表情，同做我老婆嘅劉玉翠一樣咁好戲，搞到我一路跑一路喊。」
撰文：馮仁昭
