做政客如果太小器，命都短幾年。自從年初二因為俾隻麒麟撞倒而被笑到𠵱家嘅新民黨主席葉劉淑儀，深明呢個道理，噚日佢喺facebook話，知道今期年輕人雜誌《100毛》搵咗「開心果」朱咪咪嚟扮佢（上圖），葉劉認為呢種二次創作頗具創意，即使自己被抽水，都無傷大雅。
葉劉話睇完呢期《100毛》，知道朱咪咪人生都有挫折，曾因為買舖蝕咗過百萬，好彩佢有一套面對逆境嘅哲學，讚賞呢期《100毛》「既抽水又勵志」，估唔到自己一件麒麟事，可以變得咁勵志，「看着這位扮我扮得維肖維妙的堅強女子，不禁會心微笑」，再次申明唔介意被抽水喎。