二月二十八日人民銀行宣佈，調低金融機構一年期存款及貸款利率0.25厘，市場原先憧憬會有一浸炒作，可是港股上周一高開後，好快又跌番落去，走勢同二月五日降存款準備金後非常相似。這個政策「雙頂」可以話係幾差嘅情況，因為內地政府只剩下一招會推高股市，就係減息及降準同時出擊，估計情況唔係去到極差，人行都唔會使出絕招。有見及此，我都不斷降低持股，拎番啲籌碼，先沽出賬面蝕錢同買入後沒有行嘅股票。至周四，李克強講話後，只有環保及鐵路板塊炒起，其他點到即止的行業腳軟，加上大市走勢越來越唔對路，追蹤內地金融業為主的安碩A50（2823）則跌至二月九日來的低位，所以連賺錢走勢冇咁靚的都沽埋，現時持股值博率太低。
資金極速炒一轉走人
二○○八年絕對是港股的一個分水嶺，那年金融海嘯出現後，美國開始QE，加上內地投資者加速進駐本港市場，過去的傳統智慧大部份都變成毒藥。以前價值投資法盛行，資金喜愛追捧做得好又派息的上市公司，心態係buy and hold。可是，現在資金愛追捧的卻是做得很差、但有機會易主的股票，務求極速炒一轉走人，心態係hit and run。例如植根香港多年，住宅及商用物業都做得非常出色的新地（016），市盈率及市賬率一直低於過去的平均值，目前市值約三千四百五十億元。反而業務不明，受到各方面質疑的漢能（566），市值上周卻炒至三千七百億元，曾比新地還要大。當然考慮到業務持續性、公司品牌等等基本因素，新地應該贏幾條街，但現時習慣hit and run的投資者，已少理基本面，反而有得賭就衝。上周我大減中線持倉後，亦只好加入hit and run行列，例如上周四早市太陽能板塊升得唔錯，我有參與設計的交易平台突然發現君陽（397）有大戶落飛的訊號，見佢當時只升幾個百分點，就立即衝入去，賺兩成左右笑住走，誰知過倍升幅在後頭，一個柴靜效應，叫醒一堆環保能源股，上述那些短炒無妨，長揸無膽，所以我情願買入相關的信義光能（968），波幅當然不及前兩者，但風險遠低，所以我係加入hit and run之錢，再將利潤轉為buy and hold，新老常態一起抓。
講番大市，霸王（1338）及蒙能（276）這兩隻藍燈籠式妖股亦大幅上升，更令我相信24200點會係一個好淡友的決戰位，牌面睇係淡友佔上風，所以我將所有表現一般的手上持股，全部平倉，同時，我肯定現在這水平，不能長期停留，大市必定爆邊，所以我就採用馬鞍期權出擊，long call又long put，行使價於24200點，博大升或大跌，只要爆得夠勁，回報絕對夠冚兩邊的期權金，並於星期三前走人。如果嫌期權金使費較大，可short高價call及short低價put取回部份期權金，不過就局限了單邊市的回報，有辣有唔辣，最重要係適合自己。如果今日開始下跌，我就唔敢再追，會先平期權倉，然後見大市有支持，如連續三日上升，我會小注揸期指，博阿爺出招，不過以如此市況，並唔容易出現了。
張士佳
註：筆者持有信義光能