美國上月就業數據省鏡，當中新增職位多達29.5萬份，比市場估計多六萬，失業率更降至5.5%，創六年新低，令市場對聯儲局最快六月加息的揣測升溫，加埋歐洲央行拍板今日開始買債，令美元牛氣畢呈，上周升勢三年半最勁。
美滙指數上周升2.44%，收報97.615，是十一年半高位，升幅喺二○一一年九月以來最強。彭博追蹤的十六隻主要貨幣當中，只有新台幣力保不失，其餘十五隻全部見紅，巴西央行上周逆勢加息半厘遏通脹，當地經濟恐雪上加霜，雷阿爾上周大瀉7.3%，表現敬陪末席。大路嘅歐元同瑞士法郎均跌逾3%最弱。上周提及，除非美國就業勁靚，否則在希臘暫免爆煲下，可博歐元反彈，結果好嘅唔靈。因市場揣測加息路漸近，加上跌穿1.1098美元呢個十一年低位，歐元上周跌到落1.0838。
英鎊兌歐元撲1.4
聯儲局本月中議息，加上主席耶倫已放風，市場估計儲局今次會後聲明可能刪除加息有耐性的措辭，美元升勢應未盡，尤其是兌日圓已重上121，短期有望挑戰121.85呢個逾七年高位。家陣距離六月仲有成三個月，加上各國玩緊減息，儲局幾時加息仍有好多變數，唔敢高追美元直盤的話，可繼續吼英鎊兌歐元呢個交叉盤，上周已升至1.3920，突破1.4指日可待。本欄早前一直建議逢高沽嘅金價，上周五已跌至一千一百六十七美元，創三個月低位，可袋住先。
奇兵
本欄逢周一刊出