民建聯鍾樹根自從入咗立法會後，不時展現驚人嘅語言天份，師承倉頡自創多個新詞，英語發言更加令市民印象深刻。佢早前接受黨友蔣麗芸網台節目訪問，被單刀直入問：「你都算係大學生，點會講出on your office嗰啲咁嘅＂on＂呢？」Tree根不愧係Tree根，佢話問過英文老師，錯一個preposition（介詞）都係扣五分，所以「一百分扣五分都有九十五分」，而且立法會發言唔係演講、考狀元，溝通到就得喎。順帶一提，個英文老師係佢個女。
「封維港」創佔領先河
咁八方又講句公道說話，佢英文唔係特別差，因為中文都咁上下，八方順手拈來有「很肯定」、「子烏虛有」同「雞毛鴨蒜」等。對此佢咁解釋：「我哋溝通講說話，有時自創一啲成語出嚟，將原本成語發展咗……冇問題，講錯咗，咪改囉。」佢仲怪傳媒成日執住一兩句講錯大做文章，掩蓋咗原來發言重點。
知錯能改，雖則話善莫大焉，但喺立法會席上每句發言都有逐字紀錄，成為歷史一部份，八方覺得，比一個演講比賽更需要謹言慎行。
當元秋問佢做地區工作咁多年，最自豪係乜嘢事？佢就話係一九九二年漁民搵佢幫手，話玫瑰園工程影響生計，爭取賠償，佢當時帶領漁民封鎖維港兩個鐘，仲話唔賠就去圍彭定康，當時曾被恐嚇越雷池一步就開槍，「唔畀照去，我又唔信佢開槍，好似佔中又要威又要戴頭盔呀﹖我哋唔係㗎，係死就死啦！」果然，講可以好兇狠嘅……
李八方
mailto:[email protected]
