港台節目《城市論壇》唔經唔覺已經「開壇」三十五年，主持謝志峰噚日透露，四月十二日嗰個周日做節目之前，會搞個三十五周年嘅聚會，𠵱家正密鑼緊鼓籌備中，會喺巴士站賣廣告「尋找當年的你」，搵番三十五年前台上同台下激辯過嘅「壇友」一聚。謝志峰話喎，三十周年時，梁振英同林鄭月娥都係嘉賓嚟㗎，但𠵱家兩位貴為特區第一、二把交椅，要請到佢兩個出席嘅機會，可能微啲嘞。
噚日《城市論壇》討論政改，節目向每個嘉賓送一把雨傘，係咪有乜含意？謝志峰解釋，佢哋其實送咗好耐，因為節目日曬雨淋，所以會送印有港台logo嘅雨傘畀嘉賓，最近又造咗新一批，但只係得紅色同藍色。佢話有同事建議過整黃色，但因為隻色唔靚，最終放棄咗，強調冇特別考慮嘅。