財爺曾俊華特首行情又再看漲，梗係啦，新一份財政預算案咁大手筆，而且派糖力度比放風嘅數額幾乎全數加碼，唔少市民喺新年期間突然收到大利是，梗係開心到暈，難怪港大最新民調顯示預算案評分罕有地高。雖則呢份預算案幾得民心，但花生友聽聞，有泛民政黨包括民主黨，都未決定係支持抑或反對好喎。
敵人嘅敵人，就係朋友啦。嗱，白鴿黨黨慶被特首梁振英杯葛，雙方關係跌至最新谷底，而財爺曾俊華呢，一直盛傳同梁振英不咬弦，即係同梁振英唔係老友啦。既然係咁，查實白鴿黨似乎都順理成章，支持呢份財政預算案、同財爺聯成一線「抗敵」至真㗎！
拉布長遠非好事
之但係花生友聽聞，嚟緊立法會要通過呢份預算案，白鴿黨至此雖然仲未話一定會反對，但亦唔排除會唔支持㗎喎。有黨員舉例話喎，主席劉慧卿喺預算案公佈後，鬧過財爺唔喺民生投放更多資源係「離譜」，唔知阿姐係咪唔支持？加上年輕乳鴿仔嘅作戰心態，真係估唔到個黨最後會有乜立場㗎！
據知有黨員已經諗定，若然真係要向財爺呢份預算案say no，一定要有好強嘅理據先至得，「咁多掌聲都話要反，市民都會覺得為反對而反對」。另有黨員分析，如果白鴿黨又喺預算案玩拉布，同啲激進泛民無乜分別，長遠而言對白鴿黨絕非好事，寄語小心行事。
花生友