各界對財政預算案反應唔錯，財爺鬍鬚曾都忙裏偷閒，上周五同太太去咗香港大會堂欣賞藝術節劇目《金蘭姊妹》。向來鍾意睇法國電影嘅佢，原來都喜歡呢類香港同中國味濃嘅節目，佢喺網誌撰文大讚演員演出十分感人，值得向公眾推介。
其實呢套劇係講上世紀五十年代，三個來港打工嘅媽姐故事。喇沙仔鬍鬚曾睇完劇後憶述，自己對媽姐嘅認識，係嚟自當年班上幾個少爺仔同學，話呢班少爺仔好鍾意扮媽姐嘅鄉音，例如將「做乜事」講成「做咩樹」、「知道啦」講成「豬到啦」，好鬼搞笑。佢話如果僱傭之間關係好一啲，相信發生衝突甚至暴力嘅機會亦會低一啲。