巴塞隆拿趁皇家馬德里今輪聯賽自毀長城，重登西甲榜首！噚晚嘅西甲早場，巴塞輕描淡寫，靠美斯大演帽子戲法，喺主場大炒華歷簡奴6:1，以六十二分升上榜首，多過皇馬一分。巴塞呢場雖然有尼馬停賽，「MSN」組合少咗個，但有蘇亞雷斯同美斯已經夠殺。阿蘇喺開波六分鐘就開紀錄，幫巴塞半場領先。換邊後，巴塞大開殺戒，中堅碧基藉角球攻勢入波，之後就到美斯嘅表演時間，佢喺十二分鐘內連中三元，幫巴塞拉開到5:0。尾段華歷簡奴靠十二碼破蛋，但蘇亞雷斯喺補時再入多球，為巴塞鎖定贏6:1。巴塞嘅同丹尼爾同華歷簡奴嘅羅拔圖迪圖都喺今場領紅被逐。另外，美斯今場再入三球後，今季聯賽累積入三十球，射手榜追到同基斯坦奴朗拿度並列首位。
皇馬又輸 C朗啞火
至於皇馬就喺上周六爆冷作客以0:1輸咗畀畢爾包。畢包喺廿六分鐘靠阿度里斯建功；皇馬控球雖然超過六成，但射中目標得兩次。教練安察洛堤賽後承認輸波係自己責任，認為球隊嘅進攻出咗問題，近兩仗加埋淨係入到球十二碼。
識睇，一定係睇足英台【英波Live】：
http://soccer.appledaily.com
http://bit.ly/engballlive