【牽頭起義】
自二○○三年推出，自由行政策剛好經歷十二生肖，由後沙士年代的挽救香港經濟利民措施，發展至後期引爆連串中港矛盾。育有兩子、分別四歲及兩歲的八十後媽媽馮凱茵（Zoe）感受最深，「取消一簽多行最好，我哋一班新界媽咪，真係望咗好耐」。由尋常新界師奶仔，變身為子出征、策動港媽港爸大遊行，要求「港孩」優先，今天的港媽不易為。
「爭完床位爭奶粉」
「結婚前我住粉嶺，結咗婚搬咗嚟上水，見證上水變藥房城，到處拖篋人，變化好大」。二○一二年，香港及內地都掀起「龍B潮」，Zoe的細仔陳駿，亦在那年出世，「乜都要爭，好多內地人嚟香港生仔，爭完床位爭奶粉，我大仔三歲，剛好入學，幼稚園一樣排長龍」。
「未生冇床位，生咗冇奶粉，大住肚一樣要排隊輪幼稚園，個個一肚氣」。二○一三年十月，由新界師奶組成的媽咪會，向當區區議員求助，一眾媽咪決定起義，牽頭搞大遊行，身穿代表憤怒的紅衫，由港鐵粉嶺站遊行至北區政府合署。
「嗰次真係人生難忘回憶，最初諗住媽咪會嗰五、六十人行吓就算數，點知一呼百應，竟然有幾百人出嚟行，可見個個都谷到爆」。
■記者呂麗嬋