今期原本諗住講吓舞獅運動，順手抽水講舞麒麟冷知識，不過撞正今日婦女節就無謂「撞親」某婦人（即使係佢企錯位在先），咁講女性與運動啦。
網上經常有球迷吹水，話想有個識波嘅女朋友，一齊度過英超、歐聯、世界盃嘅歲月，但現實女朋友只會識三個球員：碧咸、C朗（圖）同費托（你知點解嘅巴打），講得出朗尼同美斯已經係潛力女神，最經典嘅係上年世界盃酒吧睇美國隊嗰場，親耳聽見朋友阿嫂問Jordan有冇出場！當然，比起「同一般師奶解釋真普選」更難嘅係：同女朋友解釋咩叫越位。話又分兩頭，如果你識到個女仔踢女子足球，你又會嫌人大隻、粗魯、甲組腳（即使佢可以陪你打winning，捱眼瞓睇西甲），所以公道啲講男人亦唔易服侍。
女子足球亦都係近三十年至入奧運，而對於更保守嘅伊斯蘭國家，球場更加係女性禁地，最經典為伊朗，七十年代革命政教合一後，女人要戴頭巾亦不能肢體外露，而本世紀方成軍之伊朗女子足球隊，都係着到似潛水員一樣，得番塊面外露（你試吓着成咁去維園踢半場經已想死），但此班西亞「老虎乸」亦喺中東表現出色，難得也。早幾年更因為頭巾引發禁足奧運風波，女人要圓足球夢，竟然困難過亞視出糧。
至於我最尊敬嘅女球迷，係本港某歌星之母，因為想同阿仔溝通，幾年間狂睇各聯，年過花甲變成足球專家，家有此媽乃今世之福。
梁栢堅
填詞人+彩池人