樂壇天后陳慧琳爸爸David陳崇偉，近年做咗馬主，除咗養有大家熟悉嘅「鑽石巨匠」之外，其實仲有另一現役馬「神威福將」，不過「神威福將」仍未見戰鬥力，出賽三次名次都好後吓，想拉頭馬嘅話，暫時只可以靠「鑽石巨匠」。
講到「鑽石巨匠」，速度絕對唔使懷疑，三歲馬家陣只係八九分成熟，走勢依然稚嫩，口勁未收斂，但第三次上陣，已經可以喺同程1000米直路賽，彈離對手近兩身位取勝，可惜上次再出抽個二檔，喺直路賽嚟講係個衰位，加上郭能停賽換紀仁安騎，唔多熟馬性，結果隻馬喺跑道中央無依無靠，唔輸就奇咯！呢，今戰(8日)就唔同講法，排個12檔，可以傍住條外欄，好跑得多。
睇番對手，一批舊馬實力唔算突出，David拉頭馬嘅障礙，可能來自初出嘅不明物體「超好玩」，呢匹馬次次試閘都顯露上乘速度，唔係跑第一就係得亞、季軍，擺明早熟兼有質素，今仗一出就用到韋達，睇嚟真係有心同「鑽石巨匠」玩鋪大嘅！