買樓要經過壓力測試，銀行做生意都要經過壓力測試。聯儲局上周四公佈美國三十一間銀行通過第一階段壓力測試，測試情景係假如樓價跌25%、股市跌60%，銀行頂唔頂得順。
金融海嘯嘅教訓係除咗槓桿玩太大，另一項則係資產風險太過依賴評級機構去釐訂。部份睇落好安全嘅資產其實唔安全，但評級冇反映。所以巴塞爾協議III更注重銀行資本充足率同壓力測試，尤其係以唔同情景估算銀行能否應付流動性緊張。
上星期金管局出招收緊按揭後，亦收緊銀行按揭貸款資本充足率計算法。收緊按揭貸款資本充足率計法唔係辣招一部份，但資金成本貴咗，有機會間接令銀行加息。
銀行加息壓力增
所謂資本充足率，即係銀行嘅資本基礎同風險加權資產比率。巴塞爾協議III規定最少要8%，金管局可以按《銀行業條例》第101條提高至不超過16%，而現時香港整體銀行嘅資本充足率係16.8%。
銀行計信用風險同需要幾多資本，有兩種計法，一種係標準法（Standardized Approach），另一種係內部評級法（Internal Ratings-Based Approach，IRB），後者即早前金管局所提嘅內評法。而內評法又分為高級同基礎兩款。
IRB考慮嘅信用風險要素，包括違約率（Probability of Default，PD）、違約後損失率（Loss Given Default，LGD）、違約曝險率（Exposure at Default，EAD）、到期期限（Remaining Maturity）四項參數，着數之處係，銀行可以按內部數據得出上述幾項參數。用現時流行嘅講法，即大數據模型。大型銀行市佔率高，資料夠齊，歷史數據覆蓋面夠廣，所以傾向用IRB。更重要係，用IRB可以將風險權重壓到比標準法低。
問題就是，過去十年香港樓市總體上都係升市，二○○八年回一回又再上，PD、LGD等自然低。據金管局副總裁阮國恒指，現時香港用IRB嘅銀行有八間，而呢八間銀行，已經佔咗按揭市場八成市佔率。其中三分一達到按揭風險加權比率15%要求，但其餘嘅比率只有6至8%。所以銀行要考慮將資產配置調一調，或者加息。
金管局嘅做法係防風措施。聯儲局委員到目前為止，喺加息問題上仍然彈出彈入，但留意其口脗其實係持續壓縮市場預期，目的就係要做到凌波微步，水波不興。上周五收市美國十年債孳息急升6%，就業數據強勁，三月十八日聯儲局嘅聲明取消「耐心」用詞機會非常大，則加息周期當在六月開始。
Mr. Tregunter