大阪飛腳上季以升班馬姿態，做咗日聯、天皇盃同日聯盃三冠王，今季初仲贏埋日超盃，係威係勢咁款，不過上周六日聯開鑼戰，飛腳就喺落住雨環境下爆冷失分。主場面對FC東京，飛腳上半場由巴西前鋒安達臣柏德列頭槌頂入先開紀錄，射入球隊第七百個日聯入球，下半場有前拜仁慕尼黑中場宇佐美貴史射入十二碼，一度領先2:0，以為穩袋三分，點知客軍國腳前鋒武藤嘉紀尾段大發神威，連入兩個入球，包括補時階段射入世界波，幫FC東京以2:2逼和飛腳，主客和「D」有3.6倍；飛腳頭炮打唔響，連埋亞冠盃在內已經連續兩場贏唔到。
日聯開鑼戰吹冷風
同日日聯都幾多冷味戰果，名古屋鯨魚主場出擊，對住上季日乙亞軍松本山雅竟然陷入苦戰，結果靠前鋒路華高域喺八十分鐘建功，先以3:3逼和，拎番一分，主客和「D」仲好分，有3.75倍，波膽仲冷到60倍。而上季亞軍浦和紅鑽就有驚無險，作客升班馬湘南比馬，先失一球下，憑興梠慎三、宇賀神友彌同那須大亮各建一功，以3:1反勝。
識睇，一定係睇足英台【英波Live】：
http://soccer.appledaily.com
http://bit.ly/engballlive