小妹當了超過八年旅遊節目主持，這八年來在世界各地吃過的東西，也實在不少。導演常常跟我說：「生嘢你食唔食？辣嘢你食唔食？」我經常回一句：「屎唔臭我都食！哈哈！」因為覺得試食就是我工作的其中一部份，無論遇到甚麼食物，我也要吃給大家看，所以在這方面，我比較豁出去！而且我是非常忠於個人意願的，我覺得好味的東西，小妹會在鏡頭前大讚，而味道一般的，我亦會如實報道！
只怪生蠔太超凡
那麼，遊走了半個地球，最得小妹舌頭雀躍，位列榜首的是：法國巴黎第二區的一間小型生蠔店內的超新鮮生蠔！小妹叫這間生蠔店為「緣份生蠔」！由於老闆（應該是富二代）對自己賣出的生蠔的QC保證得過份嚴謹，若果那天的生蠔未及水準，他寧願關門大吉！有時遇着不是生蠔盛產的季節，他可以連續好幾個月不做生意，天天關門，也不讓客人吃到半隻未夠美味的生蠔！如此執着於食物質素的大廚/老闆，I LIKE！所以很多時很多朋友，一場去到巴黎想去這間超級生蠔店，都不幸地碰門釘，有緣無份也。
而小妹就跟這些生蠔頗有緣了！我去過兩次，一次為拍攝，一次是個人旅遊，兩次都在營業。第一次到訪為拍攝，這間生蠔店只得十四個位，準時傍晚六點半開門，只做一輪生意！（都說老闆是富二代）那次當我在拍攝時，拿起第一隻生蠔，準備如常地一邊吃、一邊講感受……「嘩！好好好rich呀，嘩嘩！人間仙境呀！」那隻生蠔好味到令小妺竟然說不出話來，只對着鏡頭說：「等我食多兩隻試清楚先話畀你哋知！」（非常狡猾！）更狡猾的是，導演忽然將攝錄機set在我旁邊的椅上，然後不顧我的死活，自己就一於少理：「Helen，你望住個鏡頭講嘢得㗎啦！唔使理我㗎啦！」民以食為先！哼！好一碟超高水準的生蠔，能夠令我這位相當professional的導演做出這樣失職的行為，但我不怪他，只怪那些生蠔太超凡了！
新鮮初戀海膽飯
好，排行「小妺舌頭雀躍程度」第二位的……呼之欲出了：東京新宿歌舞伎町的金八郎海膽飯！（可惜已經關門大吉了。）其實當日拍攝的實況是，我跟導演一邊做research，一邊找地方醫肚，於是在歌舞伎町的細街逛：「喂！魚生飯喎！」「1500yen成碗海膽飯喎，仲好似好足料喎！」導演問：「賣相OK喎，拍唔拍？」「試真啲先啦！」嘩！一大啖吞落去，OMG！小妺即時笑到喊：「初戀呀！我搵番初戀嘅味道啦！」又甜又甘，我直頭開心到失晒儀態，不停在大笑，但眼泛淚光，初戀喎！幾耐世紀之前的事了！竟然在一碗海膽飯內找回初戀的感覺，不得不投降了！原來這些海膽是從三崎海岸的一個歷史悠久的魚檔直送，怪不得新鮮到好像在海邊即開即食一樣！然後，在我們不用拍攝時，日又去、夜又去，可能去到店長都嚇親，最後，我的初戀對我說：「夠啦！仲回味唔夠呀你？」然後它便離我而去了！
獨食花雕醉蟹膏
最後，排名第三的，必然是上海舊吉士的花雕醉蟹膏了！小妹有個別號叫「蟹王風」，我甚麼蟹也愛吃，食大閘蟹可以食到六至七、八隻，成囗咬到損晒都會繼續食，食蟹是唯一令小妹可以坐定定、幾粒鐘都唔出聲係咁食！能夠令一個「水姐」不說話就只有蟹可以治到我！記得每次去上海，第一餐必定要去舊吉士食醉蟹膏！永遠落order時一定叫兩碟，一碟自己獨食的，另一碟才分給大家吃。真的對不起，一講到食蟹，實在要自私一點了！埋單前，小妹會叫多一碟外賣留來翌日當早餐，過份吧？記得一次，小妺跟我的拍攝隊伍一起擦醉蟹，由於小妹酒量極淺，但又吃得陶醉，我連浸着蟹膏的花雕酒一次過喝清，差點連隻碟都食埋……結果，登時醉倒街頭，當時我透不過氣，一支箭的衝出店外，很想立即躺在地上！突然：「杜如風呀！呢個係杜如風嚟㗎！」可恨上海咁多香港人！小妹立刻放棄瞓街的念頭，只躺在椅子上等司機來接我們回酒店休息！到了翌日早上，我的貼心化妝師Jenny說：「你仲有一份醉蟹膏外賣喎，你噚晚搞成咁，不如分畀導演同製片食啦！」「唔得！世間上有如此美食，我哋兩個靜靜雞快快趣擦晒佢先化妝啦！最多我唔飲啲花雕酒就冇事㗎啦！」
美食當前，自私點都要啦！
【風人院】
撰文：杜如風
旅遊節目：《流行東京1,2》阿四，《風行全世界1-5》幕後黑手，《流行首爾》 眾矢之的。著作：《風行系列1-7》
本欄逢周日刊登
