做明星雖然好風光，但有時都係有苦自己知，好似日本上位男星福士蒼汰同男歌手吉川晃司咁，最近分別整傷右手同整傷左腳，不過，佢哋有個共通點，就係受傷都要開工。
憑日劇《海女》同《今天不上班》成為新一代男神嘅福士蒼汰，昨日喺東京舉行月曆發售握手會，出席之前，福士喺網誌表示，日前練習拳擊時整傷右手，但係握手會如期舉行。而昨日參加福士握手會嘅人數多達三千五百人，右手紮住膠帶出席嘅福士仲話唔好意思，只可以用左手同大家握手。
另外，名曲《Monica》原唱者吉川晃司，日前因為駕電單車時唔小心反車，左腳骨折，大前日先至做完手術，但前晚佢又繼續開騷，仲要搵張高凳嚟放隻左腳，單腳企住唱。佢哋一個跛手一個跛腳都照開工，你話幾冇陰功。
撰文：李村姑