「球迷客機」大隊上周一齊出發，落地之後就分頭行事，利物浦係深度團，U21都唔放過；曼聯就係由南到北玩晒浪人團，差不多日日轉酒店；倫敦係雜食團，乜波都有得睇。
一落機，先來一場挑戰賽，由一班啱啱落機嘅球迷挑戰以逸待勞嘅唐山大兄，對手太強，仲book埋昆士泊流浪個見唔到盡頭嘅訓練場，球迷們疲於奔命輸波就梗，場波一共踢咗三節總共一百零五分鐘，最後仲企得穩嘅團友已當贏。
上周末，曼聯粉絲喺奧脫福睇住紅魔輕勝新特蘭，至於倫敦無大戰，焗住一班香港球迷齊齊去烏普頓睇槌仔，對水晶宮箒，個個一面倒撐韋斯咸，噢，結果唔好意思大敗一場，仲第一次目睹有球迷六十分鐘就離場走人，原來一班fans口裏說不身體卻很誠實地出咗門口見隊又排，原來係排隊入去club store，贏波買嘢，輸波又買嘢。
周日大戰就輪流上演，頭場利記球迷目睹佐敦軒達臣世界波兼贏到曼城，算係補番見唔到謝老四一面嘅遺憾，跟住鏡頭又轉番去倫敦，輪到車路士同熱刺喺溫布萊場聯賽盃決賽，團友入面兩隊都有擁躉，惟有分開坐啦。球場外嘅氣勢熱刺強勁啲，可能餓盃太耐吧，不過英國球迷有個壞習慣就係好遲先肯入場，搞到喺門口逼過行花市。勢估唔到場波比想像中一面倒，亦估唔到摩連奴開心到跌喺度，可能因為捧盃之餘，仲知道曼城失分嘅消息啦。
周一就上演球迷歐洲盃，三隊球迷匯師伯明翰紅草場，男粉絲固然全副武裝，女球迷們亦預備好落場輕抒腳頭，幾時都話好動男女最可愛。同場仲加插曼聯球迷求婚記，入波之後跪低一氣呵成接近完美，應該無人介意球入波係做馬啩！周二原本無戰事，但有球迷們決定英冠嘅賓福特都唔放過，你識貨佢畀面，地膽團友竟然可以買到第一行嘅靚位。周三，旅程最後一夜，「球迷客機」兵分五路睇夜波，曼聯迷去咗紐卡素，利迷繼續坐鎮晏菲路，阿仙奴作客QPR，熱刺回歸白鹿徑，車仔就作客韋斯咸喎，結果，大部份團友嘅愛隊都又贏一場嘅，剩番嘅小部份呢，輸少當贏啦！
KEYMAN
節目主持
mailto:[email protected]