踏入三月份，亞洲主要聯賽相繼開鑼，今日日聯開鑼就有重頭戲，由橫濱水手對川崎前鋒；水手主力中村俊輔因做手術缺陣，但高層今季搵咗幾件巴西兵助陣之餘，又請埋前法國U21嘅教練莫巴斯（Mombaerts）做主教練，加上水手有中澤佑二繼續鎮守後防，防守應該可以好似上季咁穩陣，近六次對賽贏過五次，今場主W屬正路！
睇完日聯，夜晚可以睇吓德甲奧格斯堡對禾夫斯堡呢場大戰，因為兩隊好有機會合演入球「大」騷。要數德甲近期最紅「狼堡」，佢哋攻擊力真係勁到嚇親人，荷蘭射手巴斯杜斯（圖）着晒火，早前加盟嘅翼鋒舒賀爾尼喺邊線快放傳波出嚟，佢就喺門前起腳，主隊未必頂得住呢件荷蘭兵。
奧格斯堡近四場不勝，卻錄得入六球失八球的大波膽，如果兩隊交手都開唔到「大」，真係冇計！
寫完稿約埋宗伯去小西灣睇港青友賽，一入場望上看台就見到郭指導，喺宗伯介紹完就坐低睇波，宗伯睇半場鬧足半場，話同以前啲青年軍相差幾遠，我坐佢隔籬都覺得唔好意思。
半場休息，就問郭指導同宗伯以前打同隊，佢啲火係唔係咁勁。指導話：「睇完半場，唔好話奸仔（宗伯球員花名）眼火爆，我都覺得啲細路唔及以前，老人家睇到班後生咁款，自然有股恨鐵不成鋼嘅心出嚟！」呢句真。
本地職業領隊
耳聽八方 專收好料