杜汶澤做監製？絕非《低俗喜劇》的橋段，但聽他講自己為新片《雛妓》找演員等情況，卻似十足《低》片中他所講的陰毛理論，自己拋個身出來做埋宣傳，還不夠畫面嗎？騎上著名室內設計師Marcel Wanders的Pig Table影相，足夠聯想了吧！首次做監製的《依莎貝拉》捧出了葡萄牙影后梁洛施，今趟《雛妓》則捧出了準金像獎影后蔡卓妍，誰說杜汶澤只懂搞笑？
撰文：譚倩宜
蔡卓妍（阿Sa）在《雛妓》中一句「我有俾你X㗎」技驚四座，證明自己夠秤之餘，更率先於澳門電影節封后，如今再換來香港電影金像獎影后提名及大阪電影節入場劵，隨時在四月十九日舉行的電影金像獎頒獎禮中獲加冕，好奇監製杜汶澤是如何說服阿Sa接拍這齣三級影片，阿澤早前為《雛》片宣傳接受訪問，他解釋很多時是觀眾的誤解：「大家都以為阿Sa唔肯演，但我同佢傾過，覺得佢有好多嘢都想試，只係冇機會，所以我當時估計，只要我問佢，佢就會答應。」
為阿Sa尋突破
由於阿Sa的角色是個被包養的中學生，故戲中不乏情慾場面，跟任達華的床戲，阿Sa更是側面全裸、口交、性愛場面不絕，未必相信出道以少女清純行先的阿Sa可以接受，阿澤直言過往阿Sa給輕看了，才沒機會演出此等角色：「可能係啲監製低估咗佢，演嚟演去都係啲《我老婆唔夠秤》，唔夠秤咗咁多年，阿Sa都三十幾，我覺得佢係爭啲突破，所以有機會俾佢，佢一定會好好把握，唔會咁多計較，盡全力做好個角色，就好似一個啱啱放監嘅人咁。」
女主角定了，自然要物色男主角，杜汶澤指考慮到戲內多場的「動作」戲，故腦中即閃出一個名字—任達華。「正所謂華哥拍『動作』戲嗰陣，你都唔知出世未！佢經驗咁豐富，加上大家都知佢一定唔會抽對手水，所以有佢演，我同女主角信心都會強好多。」阿澤更直言任達華是男一的不二之選，要是對方推卻的話，《雛》片便會開拍不成：「咁講可能好衰，但係真嘅，如果阿Sa推咗我的話，我都仲有可能搵到第二個演，但如果華哥推拍，我成套戲就會開唔到！好在華哥睇咗劇本之後都好鍾意。」
前年杜汶澤成為了關注奴隸問題團體Liberty Asia的大使，他決定以此題材拍成電影，這就促成電影《雛妓》開拍：「有次喺飛機睇《讀者文摘》，讀到篇講雛妓嘅文章，當時已經想做返啲嘢，加上自己做咗Liberty Asia大使，希望大家可以關注奴隸制度，所以就諗不如拍成電影。」監製此片後，阿澤指覺得性工作者跟普通人其實沒有分別，因為大家都是出賣着不同的事物來換取所需，他說：「好似我哋咁，就係出賣時間同表演去換金錢，而性工作者就係出賣肉體。每個人嘅底線唔同，對我嚟講尊嚴同自己嘅權益就一定唔可以出賣。」
「冇角色啱我做」
過往阿澤也會於自己監製的電影中粉墨登場，甚至於《DIVA華麗之后》更獲電影評論學會最佳男演員，但於《雛》片內卻未見其演出，難免令人聯想到是否擔心自己亮相，會令此片無法於內地放映？對此阿澤帶笑道：「我都有諗過，但係冇角色啱我做，其實做戲嘅嘢我識條鐵咩，所以都係專心做好監製工作。況且我同FOX傾合作嘅時候已經講好，我監製嘅電影一定係純港產片。」阿澤又謂自合拍片盛行後，電影多是以男演員主導，令一眾女演員如同被遺棄般，故他希望出點力，多拍女演員主導的電影。
化妝：小鬼（[email protected]）
髮型：Ritz（Hair Corner）
場地提供：Mira Moon Hotel
盼與Kay談情
杜汶澤跟Fox電影合作，為對方監製五齣電影，《雛妓》便是其中一齣作品。問到未來的電影題材，阿澤指希望嘗試多點新元素，但依然會以本土電影為主：「我監製嘅電影一定係以本士為主，𠵱家個個拍合拍片，港產片幾乎冇，所以係時候做返啲嘢，好在Fox又肯應承。」他透露稍後欲監製愛情電影，問到女主角可會否找曾合作過的梁洛施演出？阿澤表示反而想跟宅男女神謝安琪（Kay 圖）合作：「原因？因為我想睇囉！女神喎！同埋好似冇睇過佢談情咁，所以好恨睇佢拍愛情片。」
