自由黨同政協副主席董建華之間嘅恩恩怨怨，真係寫十日都寫唔完，好似之前有傳自由黨榮譽主席田北俊俾政協搣柴，就係老董發功；日前又話自由黨政協周梁淑怡出席政協小組會議，重提梁振英政府應該重視民意，唔好「一言堂」，結果俾同場嘅老董打斷佢說話，話周梁「唔聽話」云云。八方噚日見到田少，就梗要問佢周梁同董生呢單消息。
唔使上京去飛髮
田少一聽到八方問呢單料，就唔正面評論，不過就力撐周梁冇講錯，田少話：「民主係乜？民主就係唔聽話吖嘛！如果你話民主係要聽話，咁何來民主呢？」
田少又話，民主理念同做全國政協理念一樣，就係未必要完全認同領導講乜，如果要認同晒，咁就唔係民主啦！
田少仲話周梁只係講出香港實際情況，相信唔少港人都支持，又話不論建制泛民，授權佢做議員嘅都係選民而唔係政府，「既然我哋啲授權唔係嚟自政府，何來要聽話呢？」田少又勸CY日後應多與泛民溝通，「如果政府唔聽泛民所有意見，泛民有咁大嘅代表性，事實上即係等於唔聽市民意見」。
田少都有同老董講好說話，相信董生咁講只係有感而發，唔係針對周梁，「我諗佢唔係指周梁唔聽話，而係指香港市民好多人唔聽話，政府好難管」。
至於政圈盛傳老董發功，搞到佢無咗政協一職，田少就笑笑口話「無聽過」，又話今年無機會上京反而得閒咗，前日就出席兩個往年冇時間出席的銀行酒會，噚日更可進行「非法（飛髮）」活動，有時間去剪番個靚髮。
李八方
mailto:[email protected]