外交部駐港特派員公署早排先搞完春茗酒會，仲邀請五百名各界人士出席，屯門區議會其實喺年廿九，突然收到秘書處轉交公署電郵，話想透過屯門區議會主席，邀請全體區議員，喺本月十六日攜眷出席「新春專場聯誼午餐會」，即係話連白鴿黨資深女將、屯門區議員陳樹英等民主派都有份獲邀。
陳樹英噚日同八方講，記憶中今次係該署首次咁樣邀請區議員出席酒會，但佢已回覆咗唔去。對於今次原本有機會同丈夫「高達」李永達，破天荒喺外交部酒會撐枱腳，陳樹英坦言唔去都唔覺可惜，話除非去有正經事同官員傾，否則一般呢種社交都唔會去，自己同老公撐枱腳好過喎。