「登、登、登 、凳！」據一個足球網站統計，皇家馬德里前鋒基斯坦奴朗拿度（C朗）擁有接近十八億港元身家，係全球身家最豐厚嘅足球員。錢多到咁，除咗皇馬份糧，C朗嘅廣告代言同投資收入都唔嘢小㗎，最近佢就力谷自家品牌「CR7」新出嘅休閒鞋系列，又跳舞又打晒筋斗咁，就算係C朗，都要講句搵食艱難。
糧單流出周薪340萬
Goal.com日前公佈全球身家最豐厚足球員排行榜，C朗累積2.1億歐元（約17.9億港元）身家，僅以一千萬歐元「險勝」宿敵巴塞隆拿前鋒美斯排榜首，收入最主要當然係來自皇馬嘅豐厚年薪加獎金。有網頁就爆咗皇馬張「糧單」出嚟，C朗周薪高達28.8萬鎊（約三百四十萬港元），年薪已經成一千五百萬鎊（約1.77億港元）咁滯，表面睇落比起周薪約廿五萬鎊嘅加里夫巴利唔高得好多；但C朗嗰份係除稅後年薪，以西班牙稅率超過四成，皇馬差唔多要畀五十萬鎊（約五百九十萬港元）周薪咁滯㗎。
除咗逗人工，C朗喺場外百足咁多爪，代言品牌多籮籮，好似Nike、三星同松下等跨國企業，自己又喺葡萄牙有商業同房地產投資；但講到𠵱家最緊張，就係「CR7」呢個自家品牌。CR7之前主要推出內褲等產品，不過C朗冒住同米飯班主Nike反面嘅危險，都要推出鞋類系列，好彩佢之前「醒水」，將運動鞋系列急急下架，新產品就以皮鞋同休閒鞋為主；C朗當然要拍埋廣告宣傳，一嚟就扮晒已故歌王米高積遜咁玩moonwalk，之後仲越跳越激，跳晒hip-hop同打埋筋斗㖭，咁落力無非都係想球迷買佢對鞋啫。
傳搭上墨國女主播
講真，俄羅斯名模艾琳娜年初同C朗分手，放棄咗呢個絕世筍盤後，全球靚女都恨做C朗嫂；好似墨西哥索女主播雲妮莎（Vanessa Huppenkothen）靠上年世盃做主持一鳴驚人，最近就俾西班牙傳媒炒作佢同C朗搭上，如果屬實，呢個真係全球單身女子嘅噩耗啦！
識睇，一定係睇足英台【英波Live】：
http://soccer.appledaily.com
http://bit.ly/engballlive